अखेर शाळेतून पळून गेलेल्या विद्यार्थ्यांला पोलिसांनी शोधून काढलेच…!
दिंडनेर्ली (सागर शिंदे):
इस्पूर्ली(ता.करवीर) च्या पश्चिमेला असणाऱ्या एका इंग्रजी माध्यमाच्या निवासी शाळेतील दहावीच्या वर्गात शिकणाऱ्या एका विद्यार्थ्याला अभ्यास केला नसल्याच्या कारणावरून शिक्षक रागावले होते.त्या रागातून एक विद्यार्थी सोमवारी सायंकाळी साडेपाचच्या दरम्यान शाळेतून कुणाला काहीही न सांगता निघून गेला. काही वेळानंतर शिक्षकांना ही बाब निदर्शनास आल्यानंतर त्यांनी सर्वत्र शोध घेतला.सीसीटीव्ही कॅमेऱ्याचे फुटेज पाहिले असता तो एकटाच जात असल्याचे दिसून आले.त्यानंतर शिक्षकांनी आजू बाजूला सर्वत्र शोध घेतला पण कुठेच थांगपत्ता लागेना.त्यामुळे शिक्षकांनी त्या विद्यार्थ्यांच्या वडिलांना माहिती दिली.त्यांनीही नातेवाईक मित्रपरिवार यांच्याकडे चौकशी केली पण कुठेच शोध लागला नाही. मंगळवारी सकाळी इस्पूर्ली पोलिसांत तक्रार देण्यासाठी वडील व शिक्षक गेले असता त्यांच्याकडून पोलिसांनी सर्व माहिती घेतली.काही वर्षांपूर्वी तो कोल्हापुरातील एका तालमीमध्ये कुस्तीचा सराव करण्यासाठी राहत होता अशी माहिती मिळाली.त्या आधारे पोलिसांनी कोल्हापुरातील सबंधित तालमी मध्ये जाऊन माहिती घेतली असता तो मुलगा काही वेळापूर्वीच तिथे येऊन गेल्याचे समजले. त्यामुळे महालक्ष्मी मंदिर परिसरात शोध घेत असताना एका रिक्षा स्टॉप वरती विद्यार्थी दिसून आला. त्याला विश्वासात घेऊन पोलीस स्टेशन मध्ये येऊन चौकशी केली.आपण अभ्यास न केल्याने शिक्षक रागावले होते या रागातूनच बाहेर गेलो असल्याचे विद्यार्थ्याने सांगितले.
