Champions Trophy 2025 (Rohit Sharma) : चॅम्पियन्स ट्रॉफी २०२५ च्या स्पर्धेत भारत आणि पाकिस्तान यांच्यातील सामना दुबईमध्ये खेळला गेला. या सामन्यात विराट कोहली आणि रोहित शर्मा यांनी अनेक विक्रम प्रस्थापित केले आहेत. एकीकडे, विराटने त्याच्या एकदिवसीय कारकिर्दीत १४००० धावा पूर्ण केल्या तर दुसरीकडे, रोहित शर्माने सलामीवीर म्हणून सर्वात जलद ९ हजार एकदिवसीय धावा करण्याचा विक्रम मोडला आहे.
एकदिवसीय क्रिकेटच्या इतिहासात १४,००० धावा पूर्ण करणारा विराट कोहली हा फक्त तिसरा क्रिकेटपटू आहे. त्याच्या आधी फक्त सचिन तेंडुलकर आणि कुमार संगकारा हे करू शकले होते. विराटने त्याच्या २८७ व्या एकदिवसीय डावात ही कामगिरी केल्याने सर्वात जलद वेळेत १४ हजार धावा पूर्ण करण्याच्या बाबतीत आघाडी घेतली आहे. सचिन तेंडुलकरने हा टप्पा गाठण्यासाठी ३५० डाव घेतले आणि कुमार संगकाराने १४ हजार धावा पूर्ण करण्यासाठी ३७८ डाव घेतले.
विराट कोहली – २८७ डाव
सचिन तेंडुलकर – ३५० डाव
कुमार संगकारा – ३७८ डाव
रोहित शर्माने रचला एक विक्रम…
आपल्या संघासाठी सलामीला येत असलेला रोहित शर्मा ९,००० एकदिवसीय धावा पूर्ण करणारा जगातील फक्त सहावा क्रिकेटपटू बनला आहे. त्याच्या आधी हा विक्रम सचिन तेंडुलकर, सनथ जयसूर्या, ख्रिस गेल, अॅडम गिलख्रिस्ट आणि सौरव गांगुली यांनी केला होता. रोहितने सलामीवीर फलंदाज म्हणून १८१ डावांमध्ये ९ हजार एकदिवसीय धावा पूर्ण केल्या आहेत. त्याच्या आधी हा विक्रम सचिन तेंडुलकरच्या नावावर होता, ज्याने सलामीवीर फलंदाज म्हणून १९७ डावांमध्ये ९ हजार धावा पूर्ण केल्या होत्या.
या स्पर्धेत रोहितने ११,००० एकदिवसीय धावा पूर्ण करण्याचा विक्रमही केला आहे. बांगलादेशविरुद्धच्या सामन्यात त्याने ११ हजार धावा पूर्ण केल्या, ज्यासाठी त्याने २६१ डाव खेळले. सर्वात जलद वेळेत ११ हजार धावा पूर्ण करण्याच्या बाबतीत विराट कोहलीचे नाव अव्वल स्थानावर आहे, ज्याने फक्त २२२ डावांमध्ये हा टप्पा गाठला.
