पुणे : प्रसिद्ध लावणी नृत्यांगना गौतमी पाटील हिच्या अडचणीत वाढ होण्याची शक्यता निर्माण झाली आहे. पुण्यातील वडगाव बुद्रुक परिसरात तिच्या नावावर असलेल्या कारने एका रिक्षाला जोरदार धडक दिल्याचा प्रकार ३० सप्टेंबर रोजी घडला. या प्रकरणी पोलिसांनी गौतमी पाटीलला चौकशीसाठी नोटीस बजावली आहे.
या अपघातात रिक्षा चालक सामाजी विठ्ठल मरगळे हे गंभीर जखमी झाले असून, रिक्षामधील अन्य दोन प्रवासीही जखमी झाले आहेत. अपघातानंतर कारचालक पळून गेला होता, मात्र सीसीटीव्ही फुटेजच्या आधारे ३० वर्षीय वाहनचालकाला अटक करण्यात आली आहे.
अपघाताची घटनाक्रम :
-
घटना ३० सप्टेंबर रोजी पहाटे ५ वाजता घडली.
-
मुंबई-बंगळुरू महामार्गावरील एका हॉटेलसमोर उभी असलेल्या रिक्षाला भरधाव कारने पाठीमागून धडक दिली.
-
धडक इतकी जोरदार होती की रिक्षेचे मोठे नुकसान झाले.
-
अपघातानंतर जखमींना तातडीने रुग्णालयात दाखल करण्यात आले.
पोलिसांकडून सहकार्य नाही? – मरगळे कुटुंबीयांचा आरोप
अपघातानंतर रिक्षाचालक सामाजी मरगळे यांच्या कुटुंबीयांनी पोलिसांकडून योग्य सहकार्य मिळत नसल्याचा आरोप केला आहे. “सीसीटीव्ही फुटेजही सहजपणे उपलब्ध करून दिले जात नाहीत,” अशीही तक्रार त्यांनी केली आहे. तसेच, गौतमी पाटीलच्या टीमकडूनही या प्रकरणाकडे दुर्लक्ष होत असल्याचा आरोप करण्यात आला आहे.
राजकीय हस्तक्षेप :
या प्रकरणात आता राजकीय वादाची छाया पडली आहे. कोथरूडचे आमदार आणि राज्याचे मंत्री चंद्रकांत पाटील यांनी थेट डीसीपी संभाजी कदम यांना फोन करून दोषींवर कडक कारवाई करण्याचे निर्देश दिले आहेत.
मात्र, याच चंद्रकांत पाटील यांनी पुण्यातील कुख्यात गुंड निलेश घायवळ प्रकरणावर मौन बाळगले असल्याचे निदर्शनास येत आहे. त्यामुळे दुहेरी भूमिका घेतली जात असल्याचा आरोपही काहींकडून केला जात आहे.
सध्याची परिस्थिती :
-
पोलिसांनी चौकशी सुरू केली असून, गौतमी पाटीलला नोटीस बजावण्यात आली आहे.
-
वाहन तिच्या नावावर असल्यामुळे चौकशीसाठी जबाबदारी निश्चित करण्याची प्रक्रिया सुरू आहे.
-
अपघातातील जखमी रिक्षाचालक आणि प्रवाशांवर रुग्णालयात उपचार सुरू आहेत.
-
पुढील तपासानंतर गौतमी पाटीलवर कोणती कारवाई होते, याकडे सर्वांचे लक्ष लागले आहे.
