कोल्हापूर : शहरातील वाढत्या वाहनगर्दीला आणि वारंवार होणाऱ्या वाहतूककोंडीला आळा घालण्यासाठी कोल्हापूर वाहतूक शाखेने काही महत्त्वपूर्ण बदलांची अंमलबजावणी सुरू केली आहे. सीपीआर चौक ते जैन बोर्डिंग हा रस्ता आता ‘नो पार्किंग झोन’ म्हणून घोषित करण्यात आला असून, महावीर कॉलेज परिसरात ‘सम-विषम’ पद्धतीचा पार्किंग नियम लागू करण्यात आला आहे.
मुंबई उच्च न्यायालयाच्या कोल्हापूर सर्किट बेंचचे कामकाज सुरू झाल्यानंतर या परिसरात वाहनांची वर्दळ लक्षणीयरीत्या वाढली आहे. रस्ता अरुंद असल्याने दोन्ही बाजूंनी पार्किंग केल्यामुळे वाहतुकीचा प्रवाह वारंवार ठप्प होत होता. त्यामुळे वाहतूक शाखेने सखोल सर्वेक्षण करून तातडीने नवे नियम लागू करण्याचा निर्णय घेतला आहे.
वाहतूक निरीक्षक नंदकुमार मोरे यांनी सांगितले की, “वाहतुकीची शिस्त राखण्यासाठी आणि नागरिकांना सुरक्षित, सुकर मार्ग उपलब्ध करून देण्यासाठी हे बदल आवश्यक आहेत. अपवादात्मक परिस्थिती वगळता सर्वांनी नियमांचे काटेकोर पालन करावे.”
वाहतूक शाखेकडून नवीन नियमानुसार आवश्यक सूचना फलक लावण्याचे काम सुरू झाले आहे. तसेच नियमांचे उल्लंघन करणाऱ्यांवर कठोर कारवाई केली जाणार असल्याचेही पोलिसांनी स्पष्ट केले आहे.
नागरिक, वकील, विद्यार्थी आणि वाहनचालकांनी प्रशासनाला सहकार्य करून नवीन वाहतूक नियोजन पाळणे अत्यावश्यक आहे. नागरिकांनी थोडीशी शिस्त पाळल्यास शहरातील वाहतूक व्यवस्थेत लक्षणीय सुधारणा होईल, असा विश्वास वाहतूक विभागाने व्यक्त केला आहे.
