मालाड | वाढत्या सायबर गुन्ह्यांच्या मालिकेत मालाडमध्ये एक धक्कादायक प्रकरण उघडकीस आले आहे. ६५ वर्षीय ज्येष्ठ नागरिकाच्या मोबाईलमध्ये बनावट RTO Challan अॅप इन्स्टॉल करून स्कॅमरने तब्बल ७.६० लाखांची ऑनलाईन फसवणूक केल्याचा प्रकार समोर आला आहे. मालाड पोलिसांनी अज्ञात व्यक्तीविरोधात फसवणूक आणि आयटी अॅक्टअंतर्गत गुन्हा दाखल केला आहे.
जुनी कार, RTO अॅप आणि पहिली ‘विश्वास’ कमावणारी खेळी
पीडित कमलेश चौक्शी (वय ६५) हे मालाड पश्चिम येथील निवृत्त नागरिक. त्यांनी काही दिवसांपूर्वी एक जुनी कार खरेदी केली होती. संबंधित प्रक्रियेसाठी त्यांनी मोबाईलवर RTO Challan नावाचे अॅप डाउनलोड केले.
गाडी विकणाऱ्या व्यक्तीने चौक्शी यांना २,००० रुपयांचे चालान अॅपद्वारे भरायला सांगितले. त्यांनी पेमेंट केले आणि दुसऱ्याच दिवशी ती रक्कम त्यांच्या खात्यात पुन्हा जमा झाली.
पोलीस म्हणतात, “स्कॅमरचा हा विश्वास संपादन करण्याचा डाव होता.”
चार मिनिटांत लाखो रुपये गायब – बँक अलर्टने धडकी
२६ नोव्हेंबर रोजी अचानक चौक्शी यांच्या मोबाईलवर एचडीएफसी बँकेकडून सतत अलर्ट येऊ लागले.
-
पहिला अलर्ट : ४.९० लाख रुपये NEFT द्वारे डेबिट
-
दुसरा अलर्ट : १ लाख रुपये कमी
-
तिसरा अलर्ट : १.७० लाखांची रक्कम डेबिट
काही क्षणांतच त्यांच्या खात्यातून तब्बल ७.६० लाख रुपये गायब झाल्याचे स्पष्ट झाले. धास्तावलेल्या चौक्शी यांनी ही माहिती तातडीने त्यांच्या मुलाला दिली. मुलाने तात्काळ बँकेत धाव घेऊन अनधिकृत व्यवहारांची तक्रार नोंदवली व खाते गोठवण्याची विनंती केली.
बनावट अॅपद्वारे मोबाईल ‘हॅक’ झाल्याचा संशय
तक्रार नोंदवल्यानंतर मालाड पोलिसांनी प्राथमिक तपास केला. तपासात RTO Challan नावाचे अॅप हेच स्कॅमचे मूळ असल्याचे दिसून आले. पोलिसांच्या म्हणण्यानुसार, या बनावट अॅपच्या माध्यमातून स्कॅमरने पीडिताचा मोबाईल रिमोटली कंट्रोल केला असण्याची शक्यता आहे.
पोलिसांकडून फसवणूक आणि माहिती तंत्रज्ञान कायदा (IT Act) अंतर्गत अज्ञात व्यक्तीविरोधात गुन्हा दाखल करण्यात आला आहे. संबंधित अॅप आणि व्यवहारांचा तांत्रिक तपास सुरू आहे.
सायबर गुन्ह्यांची नवी पद्धत – नागरिकांना सतर्कतेचे आवाहन
बनावट अॅप, थर्ड-पार्टी लिंक्स आणि ‘विश्वास कमावण्याच्या’ पद्धतीने सायबर स्कॅमर नागरिकांना जाळ्यात ओढत असल्याची ही आणखी एक उदाहरण ठरली आहे.
पोलिसांनी नागरिकांना आवाहन केले आहे की—
-
केवळ अधिकृत सरकारी अॅप डाउनलोड करावेत
-
अनोळखी व्यक्तींच्या सूचनेवर पेमेंट अॅप किंवा लिंक उघडू नये
-
मोबाईलमध्ये स्क्रीन शेअरिंग/रिमोट अॅक्सेस परवानग्या देणे टाळावे
