मुंबई, दि. ३१ मार्च – नाशिकमधील भोंदू म्हणून चर्चेत आलेल्या अशोक खरात प्रकरणाला आता सोलापूर कनेक्शन समोर आले असून, या प्रकरणाने राजकीय वर्तुळात मोठी खळबळ उडवली आहे. सांगोला तालुक्यातील माजी आमदारांचा या प्रकरणाशी संबंध असल्याचा गंभीर आरोप करण्यात आला आहे.
सुषमा अंधारे (शिवसेना उद्धव बाळासाहेब ठाकरे पक्षाच्या उपनेत्या) यांनी पत्रकार परिषदेत गौप्यस्फोट करत सांगितले की, सांगोल्याचे माजी आमदार दीपक साळुंखे यांचे अशोक खरात याच्याशी आर्थिक व वैयक्तिक संबंध होते. खरातच्या मुलीला सुमारे ३२ ते ३४ लाख रुपयांचा फ्लॅट ‘गिफ्ट डीड’द्वारे देण्यात आल्याचा दावा त्यांनी केला.
अंधारे यांच्या मते, अशोक खरात आणि त्याच्या सहकाऱ्यांनी विविध ठिकाणी पूजा व धार्मिक कार्यक्रमांच्या माध्यमातून आपले जाळे निर्माण केले होते. सांगोल्यातही अशाच कार्यक्रमांना अनेक राजकीय व्यक्ती उपस्थित राहत असल्याचे त्यांनी सांगितले. काही नेत्यांनी खरातचे प्रस्थ वाढवण्यासाठी मदत केल्याचा आरोपही त्यांनी केला.
या प्रकरणाला आणखी एक राजकीय आयाम मिळत असून, २०१८ साली तत्कालीन पर्यटन मंत्री जयकुमार रावल यांच्या कार्यकाळात खरातच्या मंदिराला पर्यटन स्थळाचा दर्जा देण्यात आल्याचा दावा अंधारे यांनी केला. त्या दर्जामुळे मंदिराला निधी आणि सुविधा मिळाल्याचेही त्यांनी नमूद केले.
“या संपूर्ण प्रकरणाची सखोल चौकशी झाली पाहिजे. माझ्याकडे असलेले पुरावे मी ईडी आणि गृहमंत्र्यांना सादर करण्यास तयार आहे,” असे अंधारे यांनी स्पष्ट केले. तसेच, या प्रकरणातील सर्व संबंधितांची चौकशी करून सत्य बाहेर आणण्याची मागणी त्यांनी केली.
दरम्यान, या आरोपांमुळे सोलापूर जिल्ह्यातील राजकारण तापले असून, पुढील काळात या प्रकरणात आणखी धक्कादायक खुलासे होण्याची शक्यता व्यक्त केली जात आहे.
