प्रतिनिधी/मोहन कांबळे.
श्रावण महिन्याच्या पवित्र सुरुवातीसोबतच, जिल्हा परिषद गृहनिर्माण सोसायटी येथील ऐतिहासिक श्री नागेश्वर मंदिरात पहिला श्रावण सोमवार आणि नागपंचमी उत्सव अत्यंत मंगलमय वातावरणात साजरा करण्यात आला. या दुहेरी योगायोगानिमित्त सकाळपासूनच मंदिरात धार्मिक विधी आणि भाविकांच्या दर्शनासाठी रांगा लागल्या होत्या.
मंदिरात सकाळी ७:०० वाजल्यापासूनच विधीवत अभिषेक आणि पूजेला सुरुवात झाली. त्यानंतर सकाळी ८:०० वाजता आरती पार पडली. या धार्मिक विधींमध्ये परिसरातील बहुसंख्य महिला भाविकांचा विशेष सहभाग पाहायला मिळाला, ज्यांनी नागदेवतेचे दर्शन घेऊन पूजा-अर्चा केली. दुपारच्या १२:०० वाजता महाआरतीचे आयोजन करण्यात आले होते, ज्यामध्ये शेकडो भाविक सहभागी झाले. या वेळी भाविकांना हौसिंग सोसायटीचे वतीने उपवासाचा प्रसाद वाटप करण्यात आला.
संध्याकाळच्या वेळेस गणेश ध्यान मंदिर महिला भजनी मंडळाच्या वतीने भजनाचा कार्यक्रम आयोजित करण्यात आला होता, ज्यामुळे संपूर्ण परिसरात भक्तीमय मंगलमय वातावरण निर्माण झाले. या उत्सवाच्या यशस्वी आयोजनासाठी श्री नागेश्वर मंदिर ट्रस्ट, कोल्हापूर जिल्हा परिषद गृहनिर्माण सोसायटी आणि जिल्हा परिषद कॉलनी कला क्रीडा व सांस्कृतिक मंडळाच्या सदस्यांनी अथक परिश्रम घेतले.
या कार्यक्रमात केवळ जिल्हा परिषद कॉलनीच नव्हे, तर आजूबाजूच्या परिसरातील नागेश्वर भक्तांनी मोठ्या संख्येने उपस्थित राहून दर्शनाचा आणि प्रसादाचा लाभ घेतला.
