पुणे : राष्ट्रीय शैक्षणिक धोरण २०२० (NEP 2020) च्या अंमलबजावणीमुळे प्राध्यापकांची पदसंख्या कमी होऊ नये, तसेच आश्रमशाळांमधील मूलभूत सुविधांमध्ये सुधारणा व्हावी, यासाठी प्रभावी पाठपुरावा करण्याचा निर्धार शिक्षकमित्र कौस्तुभ गावडे यांनी व्यक्त केला आहे.
NEP २०२०च्या अंमलबजावणीमुळे अभ्यासक्रमातील बदल, नवीन विषय, कौशल्याधारित शिक्षण आणि विविध शैक्षणिक उपक्रमांमुळे महाविद्यालयांच्या कार्यभारात बदल होण्याची शक्यता आहे. मात्र, या बदलांचा आधार घेऊन प्राध्यापकांची पदसंख्या कमी करणे किंवा कार्यरत प्राध्यापकांना अतिरिक्त ठरविणे योग्य नाही. विद्यार्थीसंख्या, विषयांचा प्रत्यक्ष कार्यभार, अध्यापनाची गरज आणि नव्या शैक्षणिक धोरणामुळे निर्माण होणाऱ्या अतिरिक्त जबाबदाऱ्या यांचा सर्वंकष विचार करून प्राध्यापक पदांचे मनुष्यबळ नियोजन करावे, अशी भूमिका कौस्तुभ गावडे यांनी मांडली आहे.
प्राध्यापकांचे सेवा व रोजगारहित सुरक्षित ठेवतानाच विद्यार्थ्यांना गुणवत्तापूर्ण शिक्षण मिळावे, यासाठी पदसंख्या निश्चित करण्याचे धोरण न्याय्य, पारदर्शक आणि वास्तवाधारित असावे. यासाठी शासनस्तरावर ठोस पाठपुरावा करणार असल्याचा निर्धार त्यांनी व्यक्त केला.
आदिवासी, दुर्गम आणि वंचित घटकांतील विद्यार्थ्यांना शिक्षणाची समान संधी मिळावी, यासाठी आश्रमशाळांमधील इमारती, स्वच्छतागृहे, पिण्याचे पाणी, निवास व्यवस्था आणि शैक्षणिक सुविधांचा दर्जा उंचावण्यावर कौस्तुभ गावडे यांनी भर दिला आहे.
आश्रमशाळांमधील विद्यार्थ्यांना सुरक्षित निवास, स्वच्छ परिसर, पुरेसे पिण्याचे पाणी आणि गुणवत्तापूर्ण शिक्षण मिळणे हा त्यांचा मूलभूत हक्क आहे. त्यामुळे सन २०२६ मध्ये प्रस्तावित किंवा हाती घेण्यात आलेल्या Third-Party Audit प्रक्रियेची प्रभावी अंमलबजावणी होणे आवश्यक आहे. या तपासणीतून समोर येणाऱ्या त्रुटींवर कालमर्यादेत सुधारणा व्हाव्यात आणि संबंधित यंत्रणांची जबाबदारी निश्चित व्हावी, यासाठी शासनाकडे पाठपुरावा करणार असल्याचे कौस्तुभ गावडे यांनी स्पष्ट केले.
शिक्षक, पालक, स्थानिक समुदाय आणि प्रशासन यांच्या समन्वयातून आश्रमशाळा सुरक्षित, स्वच्छ आणि आनंददायी शिक्षणाची केंद्रे बनविण्यासाठी प्रयत्न केले जातील. प्राध्यापकांचे रोजगारहित सुरक्षित ठेवणे आणि वंचित विद्यार्थ्यांना सन्मानाने गुणवत्तापूर्ण शिक्षण मिळवून देणे, हीच शिक्षकमित्र कौस्तुभ गावडे यांची शैक्षणिक क्षेत्राप्रती बांधिलकी आहे, असे त्यांनी स्पष्ट केले.
