अक्कलकोट : पुणे विभाग शिक्षक मतदारसंघाच्या निवडणुकीच्या पार्श्वभूमीवर भारतीय जनता पक्ष महायुतीचे अधिकृत उमेदवार शिक्षक मित्र श्री. कौस्तुभ मुरलीधर गावडे यांच्या प्रचाराला अक्कलकोट विधानसभा मतदारसंघात गती देण्यासाठी महत्त्वपूर्ण चर्चा करण्यात आली. अक्कलकोट विधानसभा मतदारसंघाचे आमदार विकासरत्न मा. श्री. सचिनदादा कल्याणशेट्टी यांची भेट घेऊन निवडणुकीच्या प्रचाराचे नियोजन, शिक्षकांशी संपर्क आणि मतदानाच्या दिवसापर्यंतच्या विविध बाबींवर सविस्तर चर्चा करण्यात आली.
या भेटीदरम्यान आमदार सचिनदादा कल्याणशेट्टी यांनी अक्कलकोट विधानसभा मतदारसंघातील संस्थाचालक आणि शिक्षकांशी संवाद साधण्याच्या दृष्टीने पुढाकार घेण्याची भूमिका मांडली. संपूर्ण विधानसभा क्षेत्रातील संस्थाचालक व शिक्षकांचा मेळावा आयोजित करून प्रचाराच्या नियोजनाला दिशा देणे, शिक्षकांपर्यंत उमेदवाराची भूमिका आणि कार्याची माहिती पोहोचवणे, तसेच मतदानाच्या दिवसापर्यंतच्या नियोजनाची आखणी करून त्याची अंमलबजावणी करण्याबाबत त्यांनी सकारात्मक अभिवचन दिले.
पुणे विभाग शिक्षक मतदारसंघाच्या निवडणुकीत शिक्षकांचे प्रश्न, शैक्षणिक क्षेत्रातील विविध अडचणी आणि शिक्षकांच्या अपेक्षा यांना महत्त्वाचे स्थान असते. या पार्श्वभूमीवर अक्कलकोट विधानसभा क्षेत्रातील संस्थाचालक, शिक्षक आणि कार्यकर्त्यांशी समन्वय साधण्यावर या बैठकीत भर देण्यात आला. मतदारांशी प्रत्यक्ष संवाद साधणे, त्यांच्या प्रश्नांची माहिती घेणे आणि निवडणुकीसंदर्भातील नियोजनबद्ध संपर्क यंत्रणा उभारणे, या दृष्टीने चर्चा झाल्याचे सांगण्यात आले.
आमदार सचिनदादा कल्याणशेट्टी यांनी संपूर्ण मतदारसंघात समन्वयाने काम करण्याची तयारी दर्शविल्याने कौस्तुभ गावडे यांच्या निवडणूक व्यवस्थापनाच्या दृष्टीने या भेटीला महत्त्व प्राप्त झाले आहे. अक्कलकोटमधील संस्थाचालक, शिक्षक आणि स्थानिक कार्यकर्त्यांना एकत्र आणून निवडणूक प्रक्रियेतील संपर्क व समन्वय अधिक प्रभावी करण्यावर भर देण्यात येणार आहे.
या महत्त्वपूर्ण भेटीवेळी सोलापूर जिल्हा प्रचारप्रमुख मा. प्राचार्य डॉ. जयसिंगराव देशमुख, मराठवाडा विभागाचे विभागप्रमुख श्री. जयप्रकाश पाटील, ज्येष्ठ भाजप कार्यकर्ते श्री. मोतिराम राठोड, ज्येष्ठ नेते श्री. हरीदास जाजनूरे, पत्रकार पंडित कुंभार, डॉ. मच्छिंद्र नांगरे, प्रा. मालोजी पवार, श्री. अमोल भावसार यांच्यासह अनेक शिक्षक व कार्यकर्ते उपस्थित होते.
अक्कलकोटमधील या भेटीमुळे स्थानिक पातळीवरील समन्वय आणि प्रचारनियोजनाबाबत पुढील कार्यवाही करण्याचा मार्ग निश्चित करण्यावर भर देण्यात आला. आमदार सचिनदादा कल्याणशेट्टी यांनी व्यक्त केलेल्या सहकार्याच्या भूमिकेमुळे अक्कलकोट विधानसभा क्षेत्रातील संस्थाचालक व शिक्षकांशी संवाद साधण्यासाठी पुढाकार घेतला जाणार असल्याचे या भेटीतून स्पष्ट झाले.
