मुंबई : महाराष्ट्रातील MHT-CET परीक्षेच्या पारदर्शकतेवर पुन्हा एकदा प्रश्नचिन्ह उपस्थित झाले आहे. सोशल मीडियावर व्हायरल झालेल्या एका शिक्षकाच्या व्हिडिओ आणि कथित ऑडिओ क्लिपमुळे परीक्षेतील कथित गैरव्यवहाराची चर्चा रंगली असून, या प्रकरणाची सखोल चौकशी करण्याची मागणी जोर धरू लागली आहे.
व्हायरल व्हिडिओमध्ये 2022 पासूनच्या काही MHT-CET निकालांबाबत संशय व्यक्त करण्यात आला आहे. इयत्ता 10वी आणि 12वीमध्ये सुमारे 50 टक्के गुण मिळालेल्या काही विद्यार्थ्यांनी MHT-CET परीक्षेत 90 पेक्षा अधिक पर्सेंटाईल मिळवल्याचा दावा करण्यात आला आहे. या दाव्यामुळे परीक्षेची पारदर्शकता आणि मूल्यांकन प्रक्रियेबाबत सोशल मीडियावर विविध प्रश्न उपस्थित केले जात आहेत.
याचबरोबर सोशल मीडियावर व्हायरल झालेल्या एका कथित ऑडिओ क्लिपमध्ये इंजिनिअरिंग CET परीक्षेत 99 ते 100 पर्सेंटाईल मिळवून देण्यासाठी ₹12 ते ₹13 लाखांची मागणी केल्याचा दावा करण्यात आला आहे. तसेच विशिष्ट परीक्षा केंद्र उपलब्ध करून देणे आणि नामांकित अभियांत्रिकी महाविद्यालयात प्रवेश मिळवून देण्याचे आश्वासन दिल्याचाही दावा या कथित संभाषणात करण्यात आला आहे.
या व्हायरल व्हिडिओ आणि कथित ऑडिओ क्लिपनंतर विद्यार्थी आणि पालकांमध्ये संभ्रमाचे वातावरण निर्माण झाले आहे. परीक्षेच्या विश्वासार्हतेबाबत सोशल मीडियावर विविध चर्चा सुरू असून, संपूर्ण प्रकरणाची निष्पक्ष चौकशी करून सत्य समोर आणण्याची मागणी होत आहे.
