बालिंगा (मोहन कांबळे):
बालिंगा (ता. करवीर) येथील स्मशानभूमीत अंधाऱ्या रात्री अघोरी आणि भयंकर भानामतीचा प्रकार उघडकीस आला असून, यामुळे संपूर्ण गावात घबराटीचे आणि दहशतीचे सावट पसरले आहे. मृतदेहाचे अंत्यसंस्कार झाल्यानंतर, रक्षा विसर्जन करण्यापूर्वीच अज्ञात व्यक्तींकडून स्मशानभूमीत प्रवेश करून, विवस्त्र नारळ (श्रीफळ) वाढवण्यात आले आहेत. सर्वात धक्कादायक बाब म्हणजे, या नारळांवर स्थानिक तरुण-तरुणींची नावे लाल रंगाने लिहून तिथेच तांत्रिक पुजाअर्चा करण्यात आली आहे. या अघोरी कृत्यामुळे ग्रामस्थ प्रचंड धास्तावले असून, गावात संतापाची लाट उसळली आहे. या गंभीर प्रकाराची दखल घेऊन तत्काळ सीसीटीव्ही कॅमेरे बसवण्याची आणि अशा विकृत प्रवृत्तींचा बंदोबस्त करण्याची मागणी बालिंगा ग्रामपंचायतीचे सदस्य धनंजय ढेंगे यांनी केली आहे.
काय आहे नेमका प्रकार?
मिळालेल्या माहितीनुसार, बालिंगा स्मशानभूमीत गेल्या काही दिवसांपासून हा अघोरी प्रकार सुरू आहे. एखाद्या व्यक्तीचा मृत्यू झाल्यानंतर तिथे अंत्यसंस्कार केले जातात. त्यानंतर दुसऱ्या किंवा तिसऱ्या दिवशी रक्षा विसर्जन (अस्थी गोळा करणे) करण्याची परंपरा आहे. मात्र, याच दरम्यानच्या रात्रीचा फायदा घेऊन काही अज्ञात लोक स्मशानभूमीत घुसत आहेत. त्यांनी सोलेल नारळ (श्रीफळ) स्मशानभूमीत वाढवले आहेत. हे नारळ प्रेत जाळलेल्या जागेच्या आजूबाजूला आणि स्मशानभूमीच्या आवारात आढळून आले आहेत. या नारळांवर मुला-मुलींची नावे स्पष्टपणे लिहिलेली असून, तिथेच सिंदूर, गुलाल आणि इतर तांत्रिक साहित्य आढळून आले आहे.
जादूटोणा आणि वशीकरणाचा संशय:
वाढवलेल्या नारळांवर मुला-मुलींची नावे असल्यामुळे हा प्रकार जादूटोणा, भानामती किंवा कुप्रसिद्ध ‘वशीकरण’ प्रकाराचा भाग असण्याची दाट शक्यता वर्तवली जात आहे. आपल्या मुला-मुलींच्या जीवाला धोका निर्माण होण्याच्या भीतीपोटी पालकवर्गात प्रचंड अस्वस्थता आहे. रक्षा विसर्जनापूर्वीच असे अघोरी कृत्य केले जात असल्याने, मृताच्या आत्म्याला शांती मिळेल की नाही, याबद्दलही ग्रामस्थांमध्ये अंधश्रद्धा आणि भीती आहे.
ग्रामस्थ भयभीत, रात्री स्मशानभूमीत जाण्यास टाळाटाळ:
या प्रकारामुळे बालिंगा परिसरात तीव्र संताप व्यक्त केला जात आहे. रात्रीच्या वेळी स्मशानभूमीच्या आसपास जाण्यासही ग्रामस्थ घाबरत आहेत. ज्यांच्या मुला-मुलींची नावे अशा प्रकारे वापरली गेली आहेत, त्या कुटुंबांमध्ये थरकाप उडाला आहे. हे कृत्य करणाऱ्या विकृत लोकांचा आणि मांत्रिकांचा तात्काळ शोध घेऊन त्यांना कठोर शिक्षा करण्याची मागणी होत आहे.
धनंजय ढेंगे यांची आक्रमक भूमिका आणि सीसीटीव्हीची मागणी:
या गंभीर घटनेची दखल घेत बालिंगा ग्रामपंचायत सदस्य धनंजय ढेंगे यांनी अत्यंत आक्रमक पवित्रा घेतला आहे. त्यांनी थेट स्मशानभूमीत जाऊन परिस्थितीची पाहणी केली आणि ग्रामस्थांच्या भावना समजून घेतल्या. त्यांनी प्रशासनाकडे आणि ग्रामपंचायतीकडे तात्काळ स्मशानभूमी परिसरात सीसीटीव्ही कॅमेरे लावण्याची मागणी केली आहे. जेणेकरून रात्रीच्या वेळी इथे येणाऱ्या संशयास्पद लोकांवर नजर ठेवता येईल. तसेच, पोलिसांनी या भागात गस्त वाढवून अशा अघोरी कृत्यांचा कायमचा बंदोबस्त करावा, अन्यथा तीव्र आंदोलन छेडण्याचा इशारा ढेंगे यांनी दिला आहे.
पोलीस प्रशासनाला आव्हान:
स्मशानभूमीसारख्या पवित्र जागी अशा प्रकारचे अघोरी आणि अनैतिक कृत्य करणे हे कायदा आणि सुव्यवस्थेचे खुलेआम उल्लंघन आहे. पुरोगामी महाराष्ट्रात आजही अशा अंधश्रद्धेच्या नावाखाली समाजाला घाबरवण्याचे आणि कुणाचे तरी नुकसान करण्याचे प्रकार सुरू असणे अत्यंत लाजीरवाणे आहे. आता पोलीस प्रशासन या अज्ञात ‘भानामती’ करणाऱ्यांना किती लवकर अटक करते आणि ग्रामस्थांची भीती दूर करते, हे पाहणे महत्त्वाचे ठरेल.
