मुंबई : महाराष्ट्र विधान परिषदेच्या पदवीधर आणि शिक्षक मतदारसंघांच्या निवडणुकीसाठी भारतीय जनता पक्षाने (भाजप) पुन्हा एकदा धक्कातंत्राचा अवलंब करत तीन अधिकृत उमेदवारांची घोषणा केली आहे. भाजपच्या केंद्रीय निवडणूक समितीने रविवार, ४ ऑक्टोबर रोजी पुणे पदवीधर, नागपूर पदवीधर आणि पुणे शिक्षक मतदारसंघासाठी उमेदवारांच्या नावांना मंजुरी दिली. अपेक्षित नावांना बाजूला सारत पक्षाने काही नव्या चेहऱ्यांना संधी दिल्याने राजकीय वर्तुळात चर्चेला उधाण आले आहे.
भाजपने जाहीर केलेल्या उमेदवारांमध्ये पुणे विभाग पदवीधर मतदारसंघातून डॉ. स्मिता योगेश जाधव, नागपूर विभाग पदवीधर मतदारसंघातून माजी आमदार सुधाकर विठ्ठलराव कोहळे आणि पुणे विभाग शिक्षक मतदारसंघातून कौस्तुभ मुरलीधर गावडे यांचा समावेश आहे.
पुणे पदवीधरमध्ये डॉ. स्मिता जाधव यांना संधी
पुणे पदवीधर मतदारसंघातून भाजपने डॉ. स्मिता योगेश जाधव यांच्या नावावर शिक्कामोर्तब केले आहे. या जागेसाठी यापूर्वी शरद लाड यांच्या नावाची चर्चा होती. मात्र, पक्ष नेतृत्वाने वेगळा निर्णय घेत जाधव यांना उमेदवारी दिल्याने पुणे पदवीधर मतदारसंघातील राजकीय समीकरणांना नवे वळण मिळण्याची शक्यता आहे.
नागपूरमध्ये माजी आमदार सुधाकर कोहळे
नागपूर पदवीधर मतदारसंघातून भाजपने माजी आमदार सुधाकर विठ्ठलराव कोहळे यांना मैदानात उतरवले आहे. या मतदारसंघात काँग्रेसचे विद्यमान आमदार अभिजित वंजारी यांच्यासोबत त्यांची लढत होण्याची शक्यता आहे. भाजपकडून उमेदवारीसाठी सुधाकर कोहळे आणि माजी आमदार प्रा. अनिल सोले यांच्या नावांची चर्चा होती. अखेर पक्षाने कोहळे यांच्या नावाला पसंती दिली आहे.
पुणे शिक्षक मतदारसंघात कौस्तुभ गावडे
पुणे शिक्षक मतदारसंघासाठी भाजपने कौस्तुभ मुरलीधर गावडे यांना उमेदवारी जाहीर केली आहे. गावडे हे कोल्हापूर येथील विवेकानंद शिक्षण संस्थेचे मुख्य कार्यकारी अधिकारी असल्याचे सांगितले जाते. पुणे शिक्षक मतदारसंघाच्या उमेदवारीवरून महायुतीतील घटक पक्षांमध्ये चर्चा सुरू असताना भाजपने अखेर गावडे यांच्या नावाची घोषणा केली आहे.
पाच जागांसाठी २३ ऑक्टोबरला मतदान
राज्यात विधान परिषदेच्या पदवीधर आणि शिक्षक मतदारसंघातील एकूण पाच जागांसाठी निवडणूक होत आहे. या निवडणुकीसाठी २३ ऑक्टोबर रोजी मतदान, तर २७ ऑक्टोबर रोजी मतमोजणी होणार आहे. उमेदवारी अर्ज दाखल करण्याची अंतिम मुदत ६ ऑक्टोबर आहे.
भाजपने तीन जागांसाठी उमेदवार जाहीर केल्यानंतर आता उर्वरित दोन जागांसाठी पक्षांची भूमिका काय राहणार, तसेच महायुतीतील जागावाटपाचे समीकरण कसे ठरणार, याकडे राजकीय वर्तुळाचे लक्ष लागले आहे. विशेषतः पुणे पदवीधर आणि पुणे शिक्षक मतदारसंघात भाजपने अपेक्षेपेक्षा वेगळी नावे जाहीर केल्याने या दोन्ही मतदारसंघांतील निवडणूक अधिक रंगतदार होण्याची चिन्हे आहेत.
भाजपच्या उमेदवारांची घोषणा झाल्याने विधान परिषदेच्या पदवीधर-शिक्षक मतदारसंघातील निवडणुकीचा बिगुल आता प्रत्यक्षात वाजला असून, पुढील दोन दिवसांत उर्वरित पक्षांच्या उमेदवारांच्या घोषणेनंतर अंतिम राजकीय चित्र स्पष्ट होणार आहे.
