कोल्हापूर : कोल्हापूर जिल्हा सहकारी दूध उत्पादक संघ अर्थात ‘गोकुळ’च्या पंचवार्षिक निवडणुकीचे राजकीय चित्र आता अधिक स्पष्ट झाले आहे. महायुतीच्या छत्रपती शाहू शेतकरी विकास आघाडीच्या माध्यमातून राष्ट्रवादी काँग्रेस (अजित पवार गट), भारतीय जनता पक्ष आणि शिवसेना (शिंदे गट) यांनी आपापल्या उमेदवारांची यादी जाहीर केली आहे. याशिवाय जन सुराज्य शक्ती पक्षानेही दोन उमेदवार निवडणूक रिंगणात उतरविले आहेत.
महायुतीच्या आघाडीत राष्ट्रवादी काँग्रेस (अजित पवार गट)कडून नऊ उमेदवार, भाजपकडून सात उमेदवार आणि शिवसेना (शिंदे गट)कडून सात उमेदवार असे एकूण २३ उमेदवार जाहीर करण्यात आले आहेत. जन सुराज्य शक्ती पक्षाचे दोन उमेदवार धरून सध्या या यादीत एकूण २५ उमेदवारांची नावे समोर आली आहेत.
राष्ट्रवादी काँग्रेस (अजित पवार गट)चे उमेदवार
राष्ट्रवादी काँग्रेसकडून माजी आमदार राजेश नरसिंगराव पाटील (चंदगड), अरुणराव गणपतराव डोंगळे (राधानगरी), राहुल पांडुरंग उर्फ पी. एन. पाटील (करवीर), रणजित कृष्णराव उर्फ के. पी. पाटील (भुदरगड), युवराज दत्ताजीराव पाटील (कागल), सतीश भीमगोंडा पाटील (गडहिंग्लज), नवीद हसनसाहेब मुश्रीफ (कागल), अर्चना आनंदराव उर्फ ए. वाय. पाटील (राधानगरी) आणि रणजीत दिलीप पाटील (शिरोळ) यांना उमेदवारी देण्यात आली आहे.
भाजपचे सात उमेदवार
भारतीय जनता पक्षाकडून शौमिका अमल महाडिक (शिरोली), अंबरीशसिंह संजयसिंह घाटगे (कागल), चेतन अरुण नरके (पन्हाळा), दीपक भरमू पाटील (चंदगड), अशोक काशिनाथ चराटी (आजरा), प्रतापसिंह शंकरराव पाटील (करवीर) आणि विश्वास शंकर जाधव (पन्हाळा) यांना मैदानात उतरविण्यात आले आहे.
शिवसेना शिंदे गटाचे उमेदवार
शिवसेना शिंदे गटाकडून विश्वास नारायण पाटील (आबाजी) – करवीर, अजित शशिकांत नरके – पन्हाळा, संभाजी रंगराव पाटील – करवीर, अजित पांडुरंग पाटील – करवीर, ॲड. वीरेंद्र संजय मंडलिक – कागल, मदन बाबुराव देसाई – भुदरगड आणि डॉ. सुजित वसंतराव मिणचेकर – हातकणंगले यांना उमेदवारी देण्यात आली आहे.
जन सुराज्य शक्ती पक्षाचीही एंट्री
दरम्यान, जन सुराज्य शक्ती पक्षानेही गोकुळच्या निवडणुकीत स्वतंत्रपणे उमेदवार मैदानात उतरविले आहेत. कर्णसिंह संजयसिंह गायकवाड (शाहूवाडी) आणि अमरसिंह यशवंत पाटील (पन्हाळा) यांना उमेदवारी जाहीर करण्यात आली आहे.
जिल्ह्याच्या राजकारणाचे लक्ष ‘गोकुळ’कडे
गोकुळ ही केवळ दूध उत्पादकांची सहकारी संस्था नसून कोल्हापूर जिल्ह्याच्या राजकारणातील एक महत्त्वाचे सत्ताकेंद्र मानले जाते. त्यामुळे या निवडणुकीत महायुतीने विविध तालुक्यांतील राजकीय वजन असलेल्या नेत्यांना संधी दिल्याचे दिसत आहे. कागल, करवीर, पन्हाळा, चंदगड, राधानगरी, भुदरगड, गडहिंग्लज, शिरोळ, आजरा आणि हातकणंगले या तालुक्यांमध्ये या उमेदवारीचा परिणाम होण्याची शक्यता आहे.
विशेषतः करवीर आणि पन्हाळा तालुक्यातील उमेदवारांची संख्या, तसेच कागलमधील राजकीय समीकरणे आणि गोकुळशी संबंधित पारंपरिक गटांचे गणित यामुळे निवडणूक चुरशीची होण्याची चिन्हे आहेत. महायुतीच्या आघाडीसमोर विरोधक कोणते पॅनेल उभे करतात आणि जागावाटपाचे अंतिम समीकरण कसे राहते, याकडे आता जिल्ह्याचे लक्ष लागले आहे.
एकूणच, गोकुळच्या पंचवार्षिक निवडणुकीत महायुतीने ताकदीची राजकीय मोर्चेबांधणी केल्याचे चित्र असून, उमेदवारांच्या घोषणेनंतर निवडणुकीतील खरी रंगत आता वाढणार आहे.
